Khmer Web: Creating a Module

នៅក្នុងភាសាខ្មែរយើង ពាក្យថា «សាស្ត្រា» គឺសំដៅទោលើឯកសារផ្សេងៗ ដែលនៅក្នុងនោះ មានការកត់ត្រាទុកនូវក្បួនខ្នាតមួយចំនួន មានដូចជា សាស្ត្រាស្លឹករឹតជាដើម។ នៅក្នុងភាសា Python ពាក្យថា module គឺសំដៅទៅលើឯកសារផ្សេងៗ ដែលនៅក្នុងនោះ មានការកត់ត្រាទុកនូវ ទិន្នន័យ function និងថ្នាក់មួយចំនួន ដែលទាក់ទងគ្នាក្នុងការដោះស្រាយបញ្ហាផ្សេងៗ។ ដូចនេះ ពាក្យ សាស្ត្រា នៅក្នុងភាសាខ្មែរ គឺជាពាក្យថា module នៅក្នុងភាសា Python ។

យ៉ាងណាម៉ិញ នៅក្នុងភាសា Python បើយើងប្រមូលទិន្នន័យ function និងថ្នាក់ផ្សេងៗ មកកត់ត្រាទុកជាឯកសារមួយ ដោយដាក់ឈ្មោះថាអ្វីមួយដែលមាន extention ជា .py យើងនឹងបាន module មួយ។ ពិនិត្យកម្មវិធីខាងក្រោមនេះ៖

pi = 3.14
 
def surface(radius):
    s = radius * radius * pi
    return s
 
class Geometry():
    def __init__(self):
        print('Constructor of the class Geometry was called.')
 
    def surface(self):
        print('This is the surface method.')
 
 
def volume():
    print('The is the volume function.')
    

បើយើងរក្សាឯកសារខាងលើនេះទុក ដោយដាក់ឈ្មោះថាអ្វីមួយ មានជាឧទាហរណ៍ mymodule.py ជាដើម យោងតាមភាសា Python ឯកសារនេះគឺជា module មួយមានឈ្មោះថា mymodule ។

ឈ្មោះរបស់ module ក៏ជាឈ្មោះមួយដូចជាឈ្មោះដទៃទៀតនៅក្នុងភាសា Python ដែរ។ ដូចនេះ យើងត្រូវគោរពទៅតាមវិធាននៃការបង្កើតឈ្មោះនៅក្នុងភាសា Python នៅក្នុងការបង្កើតឈ្មោះរបស់ module ណាមួយ។

មួយវិញទៀត គោលគំនិតសំខាន់នៃការបង្កើត module គឺដើម្បីរក្សាទុកនូវក្បួនខ្នាតមួយចំនួន ដើម្បីអាចយកទៅប្រើនៅក្នុងកម្មវិធីផ្សេងៗទៀតបាន។ ដូចនេះ ក្បួនខ្នាតដែលត្រូវរក្សាទុកនៅក្នុង module ត្រូវតែមានលក្ខណៈទូទៅ និងដែលអាចមានប្រយោជន៍ក្នុងការដោះស្រាយបញ្ហាបានច្រើនប្រភេទខុសៗគ្នា៕