មួយវិញទៀត ការសរសេរកូដផ្នែកក្រាភីក មិនមែនមានន័យថា ត្រូវចេះគូរឆ្លាក់ (design) រូបគំនូរទាំងឡាយនោះទេ គឺមានន័យថាត្រូវចេះសរសេរកូដបង្កើតជា software ផ្សេងៗ ទាក់ទងនឹងការបង្កើតគំនូរត្រីមាត្រ មានដូចជាកម្មវិធី Autodesk Maya និង Autodesk 3ds Max ជាដើម។ លើសពីនេះទៀត អ្នកសរសេរកូដផ្នែកក្រាភីក ក៏ត្រូវមានសមត្ថភាពផងដែរ ក្នុងការយករូបគំនូរត្រីមាត្រទាំងឡាយ មកសរសេរកូដបង្កើតបានជាកម្មវិធីគំនូរត្រីមាត្រផ្សេងៗ មានដូចជាកម្មវិធីសារមន្ទីរនៅលើបណ្តាញ internet និងឬល្បែងឌីជីតល់ផ្សេងៗជាដើម។
យ៉ាងណាម៉ិញ ការគូរឆ្លាក់បង្កើតរូបត្រីមាត្រផ្សេងៗ គឺជាសមត្ថភាពរបស់អ្នកឌីសាញ ដែលជួនកាលគេចាត់ទុកអ្នកទាំងនោះថាជាសិល្បករ (artist) ពីព្រោះការគូរឆ្លាក់រូប ដាក់ពន្លឺ ដាក់ពណ៌ និងការប្រើប្រាស់កាមេរ៉ា ត្រូវគេចាត់ទុកថាជាទេពកោសល្យសិល្បៈ ជាជាងទេពកោសល្យវិទ្យាសាស្ត្រ (scientific talent) ។ ក៏ប៉ុន្តែទោះជាយ៉ាងណាក៏ដោយ ក៏សិល្បករផ្នែកឌីសាញទាំងនោះ ត្រូវស្គាល់អោយបានច្បាស់ពី software ដែលពួកគេយកមកប្រើប្រាស់ក្នុងការគូរឆ្លាក់រូបផងដែរ។
សរុបមក យើងត្រូវបែងចែកអោយបានច្បាស់លាស់ រវាងអ្នកសរសេរកូដផ្នែកគំនូរត្រីមាត្រ និងអ្នកគូរឆ្លាក់រូបផ្នែកគំនូរត្រីមាត្រ។ និយាយអោយចំ អ្នកសរសេរកូដផ្នែករូបគំនូរត្រីមាត្រ តែងតែយករូបគំនូរត្រីមាត្រដែលត្រូវបានគូរឆ្លាក់ដោយសិល្បករគំនូរត្រីមាត្រ មកសរសេរកូដបង្កើតបានជាកម្មវិធីគំនូរត្រីមាត្រផ្សេងៗ មានដូចជាល្បែងឌីជីតល់ជាដើម។ ឬអាចនិយាយបានម៉្យាងទៀតថា «Programmer» គឺខុសពី «Designer» ។
មួយវិញទៀត ដោយហេតុថា រហូតមកពេលបច្ចុប្បន្ននេះ វិស័យគំនូរត្រីមាត្រ ក៏បានរីករាលដាលរហូតទៅដល់គេហទំព័រផងដែរ តាមរយៈក្បួនខ្នាតជាភាសា JS នៃកញ្ចប់ WebGL ដែលត្រូវបានបញ្ចូលទៅក្នុងស្ទើរគ្រប់ browser ទាំងអស់ អ្នកអភិវឌ្ឍន៍កម្មវិធីគេហទំព័រទាំងឡាយ ក៏អាចចាប់យកជំនាញថ្មីនេះ អោយបានទាន់ពេលវេលាផងដែរ ពីព្រោះបើតាមអ្នកជំនាញ នៅពេលអនាគតដ៏ខ្លីខាងមុខនេះ អ្វីៗនឹងស្ថិតនៅលើបណ្តាញ Internet ទាំងអស់។
ទាក់ទងនឹងរឿងនេះ នៅពេលថ្មីៗនេះ មានក្រុមហ៊ុនរុស្ស៊ីមួយមានឈ្មោះថា Triumph ដែលមានមូលដ្ឋាននៅទីក្រុងម៉ូស្គូ បានបង្កើតនូវកម្មវិធីគំនូរត្រីមាត្របើកចំហរមួយមានឈ្មោះថា Blend4Web ដែលអាចត្រូវយកទៅប្រើប្រាស់សំរាប់គេហទំព័របាន។
Blend4Web ជាកម្មវិធីគំនូរត្រីមាត្រឈរនៅលើមូលដ្ឋានគ្រឹះនៃកម្មវិធី Blender ដែលជាកម្មវិធីគំនូរត្រីមាត្របើកចំហរដ៏ល្បីល្បាញមួយនៅក្នុងពិភពលោក នៅក្នុងចំណោមកម្មវិធីគំនូរត្រីមាត្រដ៏ល្បីល្បាញផ្សេងៗទៀត មានដូចជា Autodesk Maya និង Autodesk 3ds Max ជាដើម។
សំរាប់អ្នកសរសេរកម្មវិធីក្រាភីក Blend4Web គឺជា framework មួយដែលនៅក្នុងនោះមានក្បួនខ្នាតជាភាសា JS មួយចំនួន អនុញ្ញាតអោយយើងអាចយករូបគំនូរគូរឡើងដោយកម្មវិធី Blender មកសរសេរកូដបង្កើតជាកម្មវិធីត្រីមាត្របានគ្រប់ប្រភេទ ដែលអាចដំណើរការទៅបាននៅលើ browser ។ យើងអាចទាញយកកម្មវិធី Blend4Web ពីអាស័យដ្ឋានមួយនេះ៖ https://www.blend4web.com/en/downloads/ ៕
