យើងបានដឹងរួចមកហើយថា កម្មវិធីគេហទំព័រជាកម្មវិធីកំព្យូទ័រទាំងឡាយណាដែលដំណើរការនៅលើ server ដែលជាកំព្យូទ័រយក្សនៅលើបណ្តាញ Internet ។ ហើយភាគច្រើននៃកម្មវិធីទាំងនោះ មានប្រភេទជាគេហទំព័រទាំងឡាយណាដែលរក្សាទុកនូវទិន្នន័យផ្សេងៗ មានដូចជាទិន្នន័យជាបញ្ជីរឈ្មោះ និងទិន្នន័យដែលជាព័ត៌មានប្រចាំថ្ងៃ ដូចជាគេហទំព័រសារព័ត៌មានជាដើម។ យ៉ាងណាម៉ិញ ទិន្នន័យទាំងនោះនឹងត្រូវស្រង់យកទៅបង្ហាញដល់អ្នកចូលមើលគេហទំព័រ នៅពេលដែលពួកគេធ្វើសំណើរស្នើសុំ ដោយការចុចបើកទំព័រនានាជាដើម។
មួយវិញទៀត សំរាប់អ្នកអភិវឌ្ឍកម្មវិធីគេហទំព័រ ទំព័រនិមួយៗមានអាស័យដ្ឋានដោយឡែករៀងៗខ្លួន (URI) ហើយការចុចរបស់អ្នកចូលមើលគេហទំព័រ គឺជា «សំណើរ» (request) ស្នើសុំអោយកម្មវិធីគេហទំព័រ «ឆ្លើយតប» (response) មកវិញដោយបង្ហាញព័ត៌មានរបស់ទំព័រដែលមានអាស័យដ្ឋានដូចដែលអ្នកចូលមើលបានចុច។
សរុបមក «សំណើរ» និង «ការឆ្លើយតប» គឺជាប្រធានបទស្នូលនៃកម្មវិធីគេហទំព័រទាំងឡាយ។ ដូចនេះ គោលបំណងសំខាន់បំផុតនៃកម្មវិធីគេហទំព័រ គឺការដោះស្រាយបញ្ហានៅជុំវិញ «សំណើរ & ការឆ្លើយតប» នេះ។ ហើយជាទូទៅពាក្យថា «សំណើរ» នៅក្នុងកម្មវិធីគេហទំព័រដែលភាសាអង់គ្លេសហៅថា request ត្រូវគេនិយមសរសេរអក្សរកាត់ថា «req» និងពាក្យថា «ការឆ្លើយតប» ដែលភាសាអង់គ្លេសហៅថា response ត្រូវគេនិយមសរសេរអក្សរកាត់ថា «res» ។
ដូចបានលើកឡើងរួចមកហើយថា សំរាប់កម្មវិធីគេហទំព័រ នៅពេលដែលអ្នកចូលមើលចុចចង់មើលទំព័រណាមួយ អាស័យដ្ឋាន (URI) របស់ទំព័រនោះត្រូវបានបញ្ជូនទៅកាន់កម្មវិធីគេហទំព័រដើម្បីពិនិត្យនិងធ្វើការឆ្លើយតបដ៏សមស្របណាមួយ។ ហើយជាទូទៅ ការឆ្លើយតបគឺជាការបង្ហាញព័ត៌មានដែលទាក់ទងនឹងអាស័យដ្ឋាននោះនៅលើ browser ។ យន្តការពិនិត្យមើលអាស័យដ្ឋានដើំម្បីធ្វើការឆ្លើយតបដ៏សមស្របណាមួយនោះ ត្រូវគេហៅជាភាសាអង់គ្លេសថា «routing» ដែលយើងអាចប្រើពាក្យខ្មែរថា «ការធ្វើផ្លូវ» សំរាប់បកប្រែពាក្យនេះបាន។
យ៉ាងណាម៉ិញ បណ្តាក្បួនវិធីទាំងឡាយណា ដែលត្រូវយកមកប្រើដើម្បីធ្វើការឆ្លើយតបដ៏សមស្របទាក់ទងទៅនឹងអាស័យដ្ឋានណាមួយនោះ ត្រូវគេអោយឈ្មោះថាជាក្បួនវិធីស្ថិតក្នុងផ្នែក controller ដែលយើងអាចសន្មតយកពាក្យខ្មែរថា ផ្នែកនិយ័តករ សំរាប់បកប្រែពាក្យនេះបាន។
លើសពីនេះទៀត នៅក្នុងការអនុវត្តជាក់ស្តែង គេច្រើនបង្កើតក្បួននិងឬវិធីដោយឡែកមួយចំនួនទៀត ទុកសំរាប់ប្រើប្រាស់ក្នុងការបញ្ចូលឬស្រង់យកទិន្នន័យពីមូលដ្ឋានទិន្នន័យយកមកអោយក្បួនវិធីដែលស្ថិតក្នុងផ្នែកនិយ័ករ (controller) យកទៅអោយក្បួនវិធីក្នុងផ្នែកផ្សេងទៀតទៀត។ ជាទូទៅ ក្បួនវិធីទាក់ទងនឹងការបញ្ជូលឬស្រង់យកទិន្នន័យទាំងនោះត្រូវគេចាត់ទុកថាជាក្បួនវិធីស្ថិតក្នុងផ្នែក model ដែលយើងអាចកំណត់យកពាក្យខ្មែរថា ផ្នែកទិន្នន័យ សំរាប់បកប្រែពាក្យនេះបាន។
ម៉្យាងទៀត ក្រោយពីទទួលបានទិន្នន័យផ្សេងៗពីក្បួនវិធីស្ថិតក្នុងផ្នែកទិន្នន័យ (model) រួចហើយ ក្បួនវិធីក្នុងផ្នែកនិយ័តករ (controller) តែងតែផ្តល់ទិន្នន័យទាំងនោះអោយទៅក្បួនវិធីនៅ ក្នុងផ្នែកមួយទៀត ដែលមាននាទីយកទិន្នន័យទាំងនោះទៅសរសេរបញ្ចូលទៅក្នុងទំព័រនានា សំរាប់បង្ហាញដល់អ្នកចូលមើលគេហទំព័រ។ ផ្នែកសរសេររៀបចំទំព័រសំរាប់ការបង្ហាញទាំងនោះ ត្រូវគេហៅថាជាផ្នែក view ដែលយើងអាចសន្មតយកពាក្យខ្មែរថា ផ្នែកបង្ហាញ សំរាប់បកប្រែពាក្យនេះ។
សរុបមក កម្មវិធីគេហទំព័រ Laravel ក៏ដូចជាកម្មវិធីគេហទំព័រជាភាសាមួយចំនួនធំទៀតដែរ គឺមានទំរង់ទូទៅជា MODEL - VIEW - CONTROLLER ដែលគេនិយមហៅកាត់ថា MVC ។ ដូចនេះ កម្មវិធីគេហទំព័រ Laravel ជាកម្មវិធីមានទំរង់ជា MVC ៕
