Khmer Web: តំឡើង Laravel Framework

Laravel (លែរ៉ាវែល) គឺជាកញ្ចប់នៃក្បួនខ្នាតមានស្រាប់ជាភាសា PHP មួយចំនួន ដែលត្រូវបានបង្កើតឡើង ក្នុងគោលបំណងជួយសំរួលដល់ការសរសេរកម្មវិធីគេហទំព័រទាំងឡាយជាភាសា PHP ។ ជាភាសាអង់គ្លេស Laravel គឺជា framework ដ៏កំពុងមានប្រជាប្រិយភាពជាងគេសំរាប់អ្នកនិយមភាសា PHP ។ យ៉ាងណាម៉ិញ Framework នេះ ត្រូវបានបង្កើតឡើងដោយលោក Taylor Otwell នៅក្នុងឆ្នាំ ២០១១ ហើយត្រូវបានដាក់អោយប្រើដោយសេរីចាប់តាំងពីពេលនោះមក។

មុននឹងអាចទាញយកកញ្ចប់ Laravel នេះមកតំលើងនៅក្នុងកំព្យូទ័ររបស់យើងបាន យើងចាំបាច់ត្រូវតំលើងកម្មវិធី Composer ជាមុនសិន ដោយចូលទៅកាន់គេហទំព័រមួយនេះ៖ https://getcomposer.org/download/ ។ នៅពេលតំលើង កម្មវិធី Composer នឹងសុំអោយយើងជ្រើសរើសយកភាសា PHP ណាមួយយកមកប្រើសំរាប់ដំណើរការអនាគតកម្មវិធី Laravel របស់យើង ហើយយើងអាចធ្វើការជ្រើសរើសមានជាឧទាហរណ៍ ដូចនៅក្នុងរូបខាងក្រោមនេះ៖

បន្ទាប់មកទៀត ដើម្បីតំលើង Laravel Framework យើងគ្រាន់តែសរសេរនៅលើបង្អួចខ្មៅថា៖

composer create-project --prefer-dist laravel/laravel myapp

Laravel Framework នឹងត្រូវទាញយកមកពីលើបណ្តាញ Internet និងតំលើងនៅក្នុងកំព្យូទ័ររបស់យើងជាស្វ័យប្រវត្តិ។ ហើយថតមួយមានឈ្មោះថា myapp នឹងត្រូវបង្កើតឡើងដែលនៅក្នុងមានឯកសារមួយចំនួនដែលជាក្បួនខ្នាតចាំបាច់ទាំងឡាយសំរា់បអោយយើងយកមកប្រើក្នុងការសរសេរកម្មវិធីគេហទំព័រដាច់ដោយឡែកមួយ។ យ៉ាងណាម៉ិញ យើងអាចប្រើប្រាស់ឈ្មោះណាក៏បានដែរក្រៅពីឈ្មោះ myapp នេះ សំរាប់ថតដែលជាកម្មវិធីគេហទំព័ររប់ស់យើង។

បន្ទាប់មកទៀត ដើម្បីដំណើរការកម្មវិធីគេហទំព័រ Laravel ដែលទើបនឹងត្រូវបានតំលើងនេះ យើងត្រូវចូលទៅក្នុងថត ដែលជាកម្មវិធី Laravel និងសរសេរនៅលើបង្អួចខ្មៅថា៖

php artisan serve

រួចមក បើយើងបើក browser ចូលទៅកាន់កម្មវិធីគេហទំព័ររបស់យើងដែលមានអាស័យដ្ឋានជា http://127.0.0.1:8000 យើងនឹងឃើញលទ្ធផលដូចនៅក្នុងរូបខាងក្រោមនេះ៖