Khmer Web: សំណើរ & ការឆ្លើយតប

ជាទូទៅ កម្មវិធីគេហទំព័រដំណើរការទៅដោយមានអ្នកចូលមើលគេហទំព័រចុចនេះឬចុចនោះ ក្នុងគោលបំណងមើលពត៌មានណាមួយនៅលើទំព័រណាមួយ។ បានន័យថា កម្មវិធីគេហទំព័រក៏ជាកម្មវិធីឆ្លើយតបហេតុការណ៍ (Event Driven Program) ដូចជាកម្មវិធីផ្សេងៗទៀតដែរ ពីព្រោះនៅពេលដែលអ្នកចូលមើលគេហទំព័រចុចនេះឬចុចនោះ ហេតុការណ៍ខុសៗគ្នានឹងកើតមានឡើង ដែលទាមទារអោយមានការឆ្លើយតបដ៏សមស្របណាមួយក្នុងបរិបទណាមួយ។

មួយវិញទៀត សំរាប់អ្នកអភិវឌ្ឍកម្មវិធីគេហទំព័រ ទំព័រនិមួយៗមានអាស័យដ្ឋានដោយឡែករៀងៗខ្លួន (URL) ហើយការចុចរបស់អ្នកចូលមើលគេហទំព័រ គឺជា សំណើរ (request) ស្នើសុំអោយកម្មវិធីគេហទំព័រ ឆ្លើយតប (response) មកវិញដោយបង្ហាញព័ត៌មានរបស់ទំព័រដែលមានអាស័យដ្ឋានដូចដែលអ្នកចូលមើលបានចុច។

សរុបមក «សំណើរ» និង «ការឆ្លើយតប» គឺជាប្រធានបទស្នូលនៃកម្មវិធីគេហទំព័រទាំងឡាយ។ ដូចនេះ គោលបំណងសំខាន់បំផុតនៃកម្មវិធីគេហទំព័រ គឺការដោះស្រាយបញ្ហានៅជុំវិញ សំណើរ & ការឆ្លើយតប នេះ។

ដូចបានលើកឡើងរួចមកហើយថា សំរាប់កម្មវិធីគេហទំព័រ នៅពេលដែលអ្នកចូលមើលចុចចង់មើលទំព័រណាមួយ អាស័យដ្ឋាន (URL) របស់ទំព័រនោះត្រូវបានបញ្ជូនទៅកាន់កម្មវិធីគេហទំព័រដើម្បីពិនិត្យនិងធ្វើការឆ្លើយតបដ៏សមស្របណាមួយ។ ហើយជាទូទៅ ការឆ្លើយតបគឺជាការបង្ហាញព័ត៌មានដែលទាក់ទងនិងអាស័យដ្ឋាននោះនៅលើ browser ។ យន្តការពិនិត្យមើលអាស័យដ្ឋានដើំម្បីធ្វើការឆ្លើយតបដ៏សមស្របណាមួយនោះ ត្រូវគេអោយហៅជាភាសាអង់គ្លេសថា routing ដែលយើងអាចប្រើពាក្យខ្មែរថា ការកំណត់ផ្លូវ សំរាប់បកប្រែពាក្យនេះបាន។

ជាទូទៅ ការឆ្លើយតបទៅនឹងសំណើរណាមួយរបស់អ្នកចូលមើលគេហទំព័រ គឺជាការបង្ហាញព័ត៌មាននៅលើ browser ទាក់ទងនឹងអាស័យដ្ឋានណាមួយដែលជាសំណើររបស់អ្នកចូលមើល។ ហើយយន្តការបង្ហាញព័ត៌មាននៅលើ browser នេះ ត្រូវបានគេកំណត់ឈ្មោះជាភាសាអង់គ្លេសថា view ដែលយើងអាចកំណត់យកពាក្យខ្មែរថា ការបង្ហាញ សំរាប់បកប្រែពាក្យនេះបានដែរ។ ពិនិត្យកម្មវិធីខាងក្រោមនេះ៖

import cherrypy

class HelloWorld(object):
  @cherrypy.expose
  def index(self):
    return "ស្វាគមន៍មកកាន់កម្មវិធី CherryPy!"

  @cherrypy.expose
  def greet(self):
    return 'សួស្តី '+'សុខាវុធ'+'!'
    

if __name__ == '__main__':
    cherrypy.quickstart(HelloWorld())

បើយើងដំណើរការកម្មវិធីខាងលើនេះ ហើយបើក browser ចូលទៅកាន់គេហទំព័រដែលមានអាស័យដ្ឋាន http://localhost:8080/ មានន័យថា យើងធ្វើសំណើរមួយសុំអោយកម្មវិធីនេះ អោយឆ្លើយតបមកវិញ ដោយបង្ហាញព័ត៌មានទាំក់ទងនឹងអាស័យដ្ឋាននេះ ដែលជាទំព័រដើម។ ប្រការនេះបានធ្វើអោយវិធីឈ្មោះ index នៅក្នុងកម្មវិធីខាងលើ ត្រូវបានយកមកប្រើ ដែលធ្វើអោយប្រយោគ "ស្វាគមន៍មកកាន់កម្មវិធី CherryPy!" ត្រូវបានបង្ហាញនៅលើ browser ។ ក៏ប៉ុន្តែ បើសិនជាយើងចូលទៅតាមអាស័យដ្ឋាន http://localhost:8080/greet នេះវិញ វិធីឈ្មោះ greet នៅក្នុងកម្មវិធីខាងលើនឹងត្រូវយកមកប្រើ ដែលនឹងធ្វើអោយប្រយោគ 'សួស្តី '+'សុខាវុធ'+'!' ត្រូវបង្ហាញឡើងនៅលើ browser ។

សរុបមក ឈ្មោះរបស់វិធីទាំងឡាយនៅក្នុងថ្នាក់មេនៃកម្មវិធី CherryPy មាននាទីសំខាន់ណាស់ក្នុងការកំណត់ផ្លូវចូលទៅកាន់ទំព័រផ្សេងៗ។ ហើយបញ្ជាទាំងឡាយនៅក្នុងវិធីទាំងនោះ មាននាទីសំខាន់ក្នុងការបង្ហាញព័ត៌មានទាំងឡាយ ដែលជាការឆ្លើយតបទៅនឹងសំណើរទាក់ទងទៅនឹងឈ្មោះរបស់វិធីទាំងនោះ៕