WordPress ជាផ្នែកទន់ជាភាសា PHP ដ៏ល្បីល្បាញនៅជុំវិញពិភពលោក ដែលត្រូវគេយកទៅប្រើប្រាស់សំរាប់បង្កើតគេហទំព័របានស្ទើរគ្រប់ប្រភេទទាំងអស់។ រហូតមកដល់ខែ មេសា ឆ្នាំ ២០១៩ នេះ មានគេហទំព័រប្រមាណជាជាង ៦០ លាន ត្រូវបានបង្កើតឡើងដោយប្រើប្រាស់ផ្នែកទន់ WordPress នេះ។
មួយវិញទៀត ក្នុងការរចនាគំរូគេហទំព័រសំរាប់ប្រព័ន្ធ WordPress មិនទាមទារអោយយើងចាំបាច់ត្រូវធ្វើឡើងនៅលើបណ្តាញ Internet នោះទេ យើងអាចធ្វើការរចនាគំរូគេហទំព័រប្រភេទនេះ នៅក្នុងកំព្យូទ័រផ្ទាល់ខ្លួនរបស់យើងបាន ដោយគ្រាន់តែតំឡើងកញ្ចប់ពិសេសម៉្យាងមានឈ្មោះថា «AMPPS» នៅក្នុងកំព្យូទ័ររបស់យើង គឺជាការស្រេច។
ជាកិច្ចចាប់ផ្តើម យើងអាចទាញយកកញ្ចប់ AMPPS មកតំលើងនៅក្នុងកំព្យ័ររបស់យើង ដោយចូលទៅកាន់គេហទំព័រនេះ៖ http://ampps.com/download ។ នៅពេលដំឡើងរួចហើយ កម្មវិធី AMPPS នឹងដំណើរការដោយបង្ហាញបង្អួចតូចមួយដូចខាងក្រោមនេះ៖
បើយើងចុចរូបផ្ទះនៅក្នុងកម្មវិធី AMPPS ខាងលើនេះ browser នឹងបង្ហាញទំព័រដើមរបស់កម្មវិធីនេះ។ បន្ទាប់មកទៀតយើងត្រូវតំលើងផ្នែកទន់ WordPress ដោយចុចពាក្យថា WordPress នៅផ្នែកខាងឆ្វេងនៃទំព័រនេះ៖
ក្រោយពីតំឡើងផ្នែកទន់ WordPress រួចហើយ កម្មវិធី AMPPS នឹងប្រាប់យើងពីអាស័យដ្ឋានចូលទៅកាន់គេហទំព័រ WordPress របស់យើង ឧទាហរណ៍ដូចជា http://127.0.0.1/wp/ និងអាស័យដ្ឋានចូលទៅកាន់ Dashboard ឧទាហរណ៍ដូចជា http://127.0.0.1/wp/wp-admin/ ជាដើម៕
